Үткән елны өлкә хатын-кызларының “Ак калфак” оешмасы калфак чигү буенча мастер-класс үткәргән иде инде. Февральдә гү­зәл затларыбызны кабат җыеп, аларны изү чигәргә өйрәтергә булдык. “Алтын инә” ательесы хуҗабикәсе, Самара өлкәсенең халык кә­сепләре һәм кул эшләре буенча декоратив-кулланма сәнгать остасы һәм Идел буе “Этно-дар” яшь модельерлар конкурсы дипломанты Гөлнара Насыйрова аны үткәрүгә бик теләп алынды.

Төрле сәбәпләр арка­сында чараны уздыру урыны соңгы минутта диярлек үзгәргәнгә, безне өлкә ха­тын-кызларының “Ак калфак” оеш­масы җитәкчесе Разия ханым Әюпова үзенең шәхси “Розалина” татар кухнясы кафесына чакырды. “Барсы да бу хәбәрне ишеттеме икән, алдан сөйләшенгәнчә өлкә Халыклар дуслыгы йортына ялгыш барып, эзләп йөрмәсләр микән”, — дип дулкынлансак та, кунаклар сөйләшенгән сәгатькә “Розалина”да җыелды. Самарадан гына түгел, өлкәнең төрле төбәкләреннән (Сызран, Отрадный, Нефтегорск шәһәр­ләреннән, Похвистнево районы Гали авылыннан), хәтта башка регионнардан да (Оренбург өлкәсе, Татарстаннан) кырыкка якын хатын-кыз килгән иде.

“Заманча киенергә яратабыз, ә этник стильдә ясалган бизәкләр һәрвакыт модада”, — диештеләр кунакларыбыз, эш урыннарына утырышканда.

Мастер-класс алдыннан Гөл­нара Насыйрова милли чи­геш­нең тарихы, татар хатын-кызларының бизәнү әйберләре белән таныштырды. Алар матурлык өчен генә киелмәгән, хуҗасын күз тиюдән саклаган икән. Бизәк тә — ул үзе бер тарих, аның һәркайсына ниндидер мәгънә салынган.

Гөлнара ханым изү чигү өчен кирәк-ярак әйберләрне дә әзер­ләп килгән иде, һәм барысы да җиң сызганып эшкә кереште.

Очрашуны алып барган өлкә хатын-кызларының “Ак калфак” оешмасы әгъзасы Ай­сылу апа Әбдиева чигү вакытында да күңелсезләнеп утырырга бирмәде. “Кызлар, әйдәгез әле җырлап алыйк”, — дип әле моңлы татар көйләрен сузып җибәрде, әле заманча җырлар башкарып, күңелләрне күтәрде, шәҗәрә төзү турында да бик кызыклы итеп сөйләде. Чарага килгән апалар һәм яшь кызлар да бик сәләтле булып чыктылар, Айсылу апага да кушылып җырладылар, төрле кызыклы хәлләрне искә төшереп, көлешеп тә алдылар. Ә самаралы Наилә Хөсәенова үзе язган шигырьләрне укып, таң калдырды.

Кунаклар алдында өлкә ха­тын-кызларының “Ак калфак” оешмасы җитәкчесе Ра­зия Әзимҗан кызы Әюпова да чыгыш ясады. Оешманың эшчәнлеге белән таныштырганнан соң, ул үзе чиккән ашъяулыкларны да күрсәтте. Хуҗабикәнең кул эшләре белән рухланган ханымнар сумка­ларыннан үзләренең эш­ләрен дә чыгара башлады­лар. И, күрсәгез икән сез ул әйберләрнең матурлыгын! Ос­талар чиккән кулъяулыклар, сөлгеләр, шәмаилләр! Әнә Оренбургтан килгән кунагыбыз Вәсилә Дәүләтбердинованың чиккән нәфис калфаклары милли киемнәр белән генә түгел, кичке күлмәк белән дә төрле тантаналарга киеп була.

Очрашуга башкорт, казах мил­ләтеннән булган гүзәл зат­лар да килеп, үзләренең чыгышлары белән бу чараны тагын да бизәде. Сәлимә апа Краснова-Игенбәтова үз нә­селенең шәҗәрәсе белән таныштырды, нәсел агачын төзү киләчәк буын өчен мөһим булуын билгеләп үтте. Ул кул эшләрен дә алып килгән иде, чигешләрдә татар һәм башкорт бизәкләрен чагыштыру да бик кызыклы булды.

Мастер-класс шундый җан­лы, матур барды ки, ул бер як­тан элеккеге заманда аулак өй­ләрдә кич утыруларны хәтер­ләтте.

Гөлнара Насыйрова җитәк­челегендә изүләр тиз арада чигелеп тә бетте. Тик, эшләре тәмамланса да, ханымнар сөй­ләшеп, аралашып туймаганнар иде әле. Гаилә, оныклар турында сөйләшә-сөйләшә сүз әкрен генә татар ашлары турында китте. Аш пешергәндә һәр хуҗабикәнең үз сере бар, диләр бит, пәрәмәч пешерүнең дә үзенчәлекләре күп икән. Тиз генә татар халкының яраткан бу ризыгын пешерү буенча мастер-класс үткәреп алырга булдылар. Төрле җирләрдән килгән ханымнар һәркайсы үз ысулы белән бүлеште, рецептлар белән дә алыштылар.

Ул арада Разия ханым Әю­пова кунакларны милли ризык­лардан сыгылып торган өстәл артына чакырды. Сыйланып, чәй эчкән арада бу мастер-класс буенча нәтиҗәләр ясалды, киләсе очрашулар турында сөйләшенде. “Балаларны тәрбияләүгә, хатын-кызның исән­леген саклауга багышлан­ган темаларга да очрашып сөйләшик әле”, — дигән тәкъ­димнәр күп булды. “Димәк, без­нең очрашу бушка үтмәде. Ха­тын-кызларыбызга, аеруча шә­һәрдә яшәүче гүзәл затларыбызга аралашу җитешми. Аларга бергә җыелышып сөй­ләшүләр, тәҗрибәләре белән уртаклашулар зарур”, — дип үз фикерен белдерде “Ак калфак” оешмасы әгъзасы Айсылу Әбдиева. Туганнардай сөй­ләшеп-гәпләшеп утырган кунакларга карап, аның сүзләре хак булуына инанмыйча мөмкин түгел иде. Шулай, биш сәгать вакытның үткәнен дә сизми калганбыз.

Әлбәттә, бу матур очрашуны әзерләүгә күп көч куелды. Самараның “Дуслык” иҗади-иҗтимагый оешмасы прези­денты Фәхретдин әфәнде Ка­­ню­каевка мастер-класс үт­кәрүне хуп­лап, матди ярдәм күрсәткәне өчен зур рәхмәт. Чараны оештырган өлкә хатын-кызларының “Ак калфак” оешмасы җитәкчесе Разия Әюпова һәм әгъзалары Гөлнара Насыйрова, Айсылу Әбдиеваның тырышлыкларын да билгеләп үтмичә булмый.

Килгән кунаклар да, оештыручылар да бик канәгать булып, тагын очрашырга вәгъдәләр биреп, саубуллаштылар.

Гөлфия КӘРИМОВА,

мастер-классны оештыручыларының берсе, өлкә хатын-кызларының “Ак калфак” оешмасы әгъзасы. 

«Бердәмлек».

КОНТЕКСТ:

Мастер-класс по вышиванию татарских женских нагрудников — изу и головных уборов — калфак (ФОТОРЕПОРТАЖ)

Просмотров: 2103