Самар өлкәсенең татар милли-мәдәни мөхтәрияте менә инде өченче ел шәһәребезнең һәм өлкәбезнең тарихи татар һәм, гомумән, милли урыннарын мәңгеләштерү буенча эш алып бара. Кү­ренекле якташларыбыз яшәгән, дин, милли мәгариф, мәдәният белән бәй­ләнгән биналарга хәтер такталарын кую хезмәте уңышлы гына башкарылып килә.

Заманында

• Самарның өченче мә­хәллә мәсҗиде урнашкан Спорт Са­раена,
• Галактионовский урамында (йорт саны 64) Советлар Союзы Герое Рәүф Кутуев яшәгән өйгә,
• Камышлы районының Иске Ярмәк авылында тальян гармуннарын ясау остасы Гали Гәрәев яшәгән йортка,
• Ленинградский урамында Идел буе хәрби округының сәяси бүлеге кар­шындагы профессиональ татар музыка-драма студиясе эшләгән өйгә,
• Алексей Толстой урамында Тарихи мәсҗид янында 1902 — 1918 елларда татар мәктәбе эшләгән бинага

шушындый такталар эленде инде.

Бу эш «Самар тарихында татар исемнәре һәм вакыйгалар» проекты кысала­рында, Самар өлкәсе Һәм Татарстан Республикасы хөкүмәтләре биргән ак­чага башкарыла.

Быел да, Самар төбәге халыклары һәм милли культуралар көне алдыннан, бу изге гамәлләр дәвам ителеп, шәһә­ребезнең күп милләтле тарихына багыш­ланган хәтер такталарын элү тантанасы узды.

Аларның берсе Братьев Коростылевых урамында (йорт саны 144) 1921 -1929 елларда татар-башкорт педагогия техникумы эшләп килгән бинага урнаштырылды.

Ә икенчесе Молодогвардейский ура­мында (йорт саны 59) «Средне-Волжская коммуна» исемле нәшриятта «Колхозчы», «Комбайн» татар, «Шлях до комунiзму» украин, «Колхозник» чуаш, «Сятко» мукшы гәҗитәләре чыгып килгән йортка куел­ды.

Бәйрәмне оештыруда Халыклар дуслыгы йорты җитәкчелеге һәм хезмәткәрләре, шәһәр администрациясенең финанслар департаменты да үз өлешен керткән.

Тантанага өлкә һәм шәһәр адми­нистрацияләре вәкилләре, депутатлар, өлкәбез мөфтие Талип хәзрәт Яруллин, Самар Җәмигъ мәсҗиде вәкилләре, төрле халыкларның милли-мәдәни оеш­малары җитәкчеләре һәм активистлары җыелды.

Өлкә татар милли-мәдәни мөхтәрияте рәисе Әнвәр Горланов кунакларны сәламләп:

-    Әлеге хезмәт күп милләтле шә­һәребезне берләштерүдә әһәмиятле роль уйный. Форсаттан файдаланып, Самар өлкәсе, шәһәребез һәм Татарстан Республикасы хөкүмәтләренә, безнең идеябызны хуплап, ярдәм күрсәткәннәре өчен, зур рәхмәтемне белдерәм. Бу эшебезне дәвам итәчәкбез, чөнки мондый гамәлләр безнең төбәгебезнең күп милләтле тормышына, аның чәчәк атуына, төрле халыкларның дус яшәвенә ишарә булып тора, — диде.

- Советлар Союзының беренче елларында барлыкка килгән татар-баш­корт педагогия техникумы өлкәбез мө­селманнары мәгарифендә — милли кадрларны, партия органнары хезмәткәр­ләрен әзерләүдә Һәм, гомумән, СССРда культураны күтәрүдә зур роль уйнаган.

Молодогвардейский урамында ур­нашкан бина 19нчы гасырда төзелгән. Хәзер ул регион күләмендә мәдәни мирас объекты булып санала. Советлар Союзының беренче елларында халыкны гыйлемле итү, аның культурасын үстерү дәүләтнең төп бурычларының берсе була. Төрле милли телләрдә бастырылган гәҗитә-журналлар да бу эштә әһә­миятле урын тотканнар, — дип сөйләде такталарны әзерләү хезмәтенең күп өле­шен үз өстенә алган өлкә мөхтәриятенең директоры Шамил Галимов.

Губернатор администрация­сенең милли һәм конфессиональ сәясәт идарәсе җитәкчесе На­дежда Осипова:

- Халык үз тарихын, аның кадерен белергә тиеш. Ватанпәрвәрлек, үз мил­ләтеңә, туган ягыңа, илеңә мәхәббәт шуңардан башлана да инде.

Хәтер такталары ачу кебек, тари­хыбызны барлау, аны саклау буенча башкарылган эшләр халыклар арасындагы татулыкны, бердәмлекне ныгытуга да зур өлеш кертәләр.

Самарлылар, шушы урыннан узып киткәндә, тукталырлар һәм, хәтер такталарында язылган сүзләрне укып, төбә­гебездә элек-электән төрле милләтләр яшәгәнен белеп, горурланырлар, — дип чыгыш ясады.

Миләүшә ГАЗЫЙМ

язмасы һәм фотосурәтләре.

«Сәлам» газетасы.

КОНТЕКСТ:

Состоялось торжественное открытие двух мемориальных досок в рамках проекта «Самара многонациональная: имена и события в истории» (ФОТОРЕПОРТАЖ)

Просмотров: 1838