Кичә вакыйгаларга бик бай көн булды. Безнең Иске Ярмәк авылына Казан шәһәреннән олы мәртәбәле кунаклар — Татарстан Республикасы мөселманнары Диния нәзарәтенең баш казые Җәлил хәзрәт ФАЗЛЫЕВ, «Ислам динен кабул итүгә — 1000 ел» исемендәге мәдрәсә ректоры Ильяс хәзрәт ҖИҺАНШИН һәм Кадышево бистәсендәге «Фәтих» мәсҗиде имамы Фәннур хәзрәт ГАЙНУЛЛИН килделәр.
Иң беренче итеп без өч гасыр элек Иске Ярмәк авылының башлангычы булган Татар Байтуганы авылына барып, Әлифба музеенда булдык. Җәлил хәзрәт Сәләй Вагыйзовны бик яхшы белгән икән. Музей өчен зур хезмәт куйган Нурания ханым Абзалова һәм шул авыл имамы Мөхәммәднур хәзрәт Гарипов катнашында музейны карап, аятьләр укып, тәмле итеп пешерелгән милли ризыклардан авыз иттек. Бик сокландылар кунаклар музей йорты белән.
Жәлил хәзрәт музей комплексы җитәкчесе Нурания Абзаловага «Тигез гомер итегез» дигән бик эчтәлекле китабын бүләк итте. Зур рәхмәт авторга.
Саубуллашып, Иске Ярмәк авылына юл тоттык. Анда безне шатлыклы вакыйга көтә иде, яңа мәсҗиднең манарасына ай кую мәрасимендә катнаштык.
Тәкбирләр әйтеп, догалар укыганнан соң, халыкка социаль ярдәм күрсәтү үзәгендә ял итүче апалар белән очраштык. Биредә Җәлил хәзрәт Фазлыев матур итеп вәгазьләр сөйләгәч, авыл һәм мәктәп музейларын да карап чыгып, мәсҗидкә юнәлдек.
Мәсҗидтә өйлә намазына кадәр дә, намаздан соң да Җәлил хәзрәтнең вәгазьләрен тыңлап, җыелган халык белән бергәләп Корбан мәҗлесендә катнаштык.
Аннан соң инде кадерле кунаклар белән юл өстендәге мөсафирлар өчен ачылган мәсҗид бинасында намазлар укып чыктык. Матур теләкләр теләп, кадерле кунакларны Самарага озаттык.
Иске Ярмәк авылы мәсҗиде имамы Рамил-Габдулла хәзрәт МӨХӘММӘТКӘРИМ.
С.Г. Вәгыйзов исемендәге музей комплексы җитәкчесе Нурания АБЗАЛОВА.
Камышлы районы.
Просмотров: 756