2012 елда WorldSkills – дөньядагы иң зур халыкара һөнәри осталык бәйгесенә Россия дә килеп кушылды һәм инде күп кенә уку йортлары студентларны аның стандартлары буенча хәзерли. Самараның социаль педагогика көллияте дә бу хәрәкәттән калмый.
Апрельдә бу уку йорты үзенең укучылары арасында WorldSkillsRussia бәйгесен уздырган иде һәм анда милләттәшебез — өченче курс студенты Юлия Карипова җиңү яулады.
- Көллияттә музыка укытучысы һөнәрен үзләштерәм. Бәйгедә дәрес алып бара белү осталыкларыбызны бәяләделәр, практик яктан да белемебезне тикшерделәр. Анда төрле тавыш кораллары (кашык, стакан һәм башка) һәм тән әгъзалары ярдәмендә (бу элемент боди перкуссия дип атала) кул чабып, аякларны тыпырдатып, тел һәм иреннәр белән төрле авазлар чыгарып, музыка сыман тавыш китереп чыгарырга тиеш идек. Көндәшләрем көчле булсалар да, жюри җиңүгә мине лаеклы дип тапты һәм ял итү сәяхәтенә сертификат тапшырды.
Чемпионатны кирәкле гамәл дип саныйм, ул кызлар һәм егетләр арасында үз һөнәрләренең остазларын ачыкларга ярдәм итә, — дип кичерешләре белән уртаклашты җиңүче.
Алия АРСЛАНОВА.
Просмотров: 1421