Яңа Мансур һәм Сосновка халкы бердәм булып фронтка булыша
Похвистнево районының ямьле бер җирендә ике авыл — Сосновка һәм Яңа Мансур янәшә урнашканнар. Аларны берничә чакрым аерып тора, әмма күп нәрсә берләштерә: кайгыртучанлык хисе, Ватанга мәхәббәт һәм бүгенге көндә илебез мәнфәгатьләрен яклаучыларга булышу теләге.
Махсус хәрби операция башланганнан бирле бу авылларда яшәүчеләр җиңүне якынайтуга үз өлешләрен кертәләр. Алар акча җыялар, кирәкле әйберләр сатып алалар, сугышчыларның үтенечләрен үтиләр, һәм барысын да тыныч кына, артык сүз әйтмичә башкаралар.
Биредә җылы оекбашлар һәм мунчалалар бәйлиләр, окоп шәмнәре һәм тактик беләзекләр ясыйлар. Сосновка кешеләре, алгы сызыктагы хәрбиләребез өчен бергәләп маскировка челтәрләрен үрер өчен, еш кына Мансурга киләләр. Һәм алар үзләренең якташларына яисә башка төбәкләр сугышчыларына җиткерәләчәкме — монысы мөһим түгел, иң әһәмиятлесе – ярдәм барысына да кирәк.
Сосновка һәм Яңа Мансур волонтерлары районыбызда иң ышанычлы ярдәмчеләр исемлегенә керәләр. Алар фронтка шәхси гигиена предметлары, кремнар һәм спрейлар, дымлы сөлгеләр, тутыкмый торган савыт-саба тапшыралар. Ә күптән түгел һәрвакыт кирәкле һәм дефицит булган инвертор генераторын, шулай ук «Нива» өчен дүрт яңа баллон сатып алганнар. Яңа Мансур авылыннан якташларын мотоцикл белән шатландырганнар. Мондый бүләк өчен ул махсус хәрби операция зонасыннан рәхмәтләрен дә җиткереп өлгергән инде. Һәм мондый мисаллар дистәләгән.
Әйтергә кирәк, Сосновка һәм Яңа Мансур кешеләре районның башка волонтерлары белән бергәләп эшлиләр, фронтка уртак йөк җибәрәләр. Һәм чираттагы машина тутырылып, сугышчылар посылкаларны алгач, бу аларның һәрберсенең казанышы булып тора.
Яңа Мансур һәм Сосновка авыллары халкы – бердәмлек үрнәге. Алар иң авыр вакытларда да кешелекле, ярдәмчел һәм көчле булып калырга мөмкин икәнлеген раслыйлар. Олы рәхмәтләребез сезгә, хөрмәтле волонтерлар! Барысы да Җиңү өчен! Үзебезнекеләрне ташламыйбыз!
Нәсимә МӘХМҮТШИНА.
«Бердәмлек».
Просмотров: 438