Бу очрашу Самараның “Беаток” клубында булып үтте. Анда Россия журналистлары берлегенең Самара өлкә оешмасы ветераннары Әфган сугышы ветераннары белән дусларча очрашу уздырдылар. Биредә кайчандыр өлкәбезнең һәм шәһәребезнең төрле басмаларында эшләгән журналистлар — Валерий Штепо, Александр Барышев, Валентина Жоголева, Сергей Баранов, Татьяна Пархачева, шагыйрь-публицист Борис Столяров һәм башкалар бар иде. Журналист-ветераннар арасында мин дә, унбиш елга якын гомеремне “Волжская коммуна”, ә аннан 23 елдан артык “Бердәмлек” татар газетасына багышлаган Рәфгать Әһлиуллин да, бар идем.
Очрашуны Россия Журналистлары берлегенең Самара өлкә оешмасы рәисе Ирина Цветкова ачып җибәрде. Ул үзенең тәбрикләү сүзендә ветераннарга армый-талмый хезмәт итүләре һәм рух көчлелеге күрсәтүләре өчен чын күңеленнән рәхмәтен белдерде.
Дуслык өстәле артына утырышкан ветераннар үзләренең үткәннәрен искә алдылар, тормышларындагы иң якты вакыйгалар турында сөйләделәр, хәзерге заман проблемаларына тукталдылар.
Әфган сугышы ветераннары — 56нчы аерым десант-штурм бригадасы һәм спецназда хезмәт итүчеләр, моннан берничә ел элек кенә “Континент” оешмасына берләшүләре турында сөйләделәр. Бу оешма яшьләр һәм ятим балалар йортларында тәрбияләнүчеләр арасында зур тәрбия эшләре дә алып бара икән.
Очрашу ахырында ветераннар яшьләргә патриотик тәрбия бирү буенча үзара хезмәттәшлекне киләчәктә дә дәвам итәргә теләк белдерделәр.
Рәфгать ӘҺЛИУЛЛИН.
Просмотров: 929