4 июньдә Самара өлкәсе татар җәмгыятенең гомуми җыелышы узды
Быел әлеге иң борынгы милли иҗтимагый оешмага 37 яшь тулды. Шушы еллар эчендә аның эшчәнлегендә татар мәдәниятен, мәгарифен, телен һәм, әлбәттә, традицияләрен саклап калуга һәм пропагандалауга зур өлеш керткән йөзләгән актив милләттәшләребез катнашты.
Шунысы куанычлы ки, бу җәмгыять бүген дә үз хезмәтен уңышлы дәвам итә. Соңгы биш елда “Туган тел”нең башкарма директоры вазыйфаларын Гүзәл Ибраһим кызы Рамазанова башкарды. Быел исә аның вәкаләтләренең срогы тәмамланды. Шуңа күрә, Устав таләп иткәнчә, бергә җыелып, яңа директор сайлау яки гамәлдәгесен калдыру максатыннан оешманың гомуми җыелышын үткәрергә карар кылынды.
Утырыш башланыр алдыннан катнашучыларны җәмгыятьнең президенты Ильяс Шәкүров сәламләде. Ул «Туган тел»нең Халыклар дуслыгы йорты һәм хакимият органнары тарафыннан уздырылган милли сәясәт өлкәсендә дәүләт программасын гамәлгә ашыруга юнәлтелгән чараларда катнашып килүен билгеләп үтте. Шулай ук Гүзәл Рамазанованың бишьеллык хезмәтенә югары бәя бирде һәм аңа әлеге иҗтимагый вазыйфасындагы эшчәнлеген дәвам итәргә тәкъдим ясады.
Аннан соң «Туган тел»нең башкарма директоры Гүзәл Рамазанова эш нәтиҗәләре турында хисап тотты һәм оешманың алдагы планнары белән уртаклашты.
Гүзәл Рамазанова соңгы елларда төбәкнең татар тормышында булган вакыйгалар һәм чаралар турында мәгълүмат бирү өчен социаль челтәрләр кулланыла башлавын әйттеп үтте. Шулай ук ул барлык җыелучыларны оешманың эшчәнлегендә активрак катнашырга һәм татар яшьләре белән эшне көчәйтергә өндәде.
Башкарма директорның хезмәте канәгатьләнерлек дип табылды һәм Гүзәл Ибраһим кызы яңадан киләсе бишьеллык срокка сайланды.
Данияр СӘЙФИЕВ.
Әнәс Мингалиев фотосурәте.
«Бердәмлек».
Просмотров: 287
Добавить комментарий