Бәйгене оештыручы, клуб мөдире Рузалия Гафурова “Гламур кыз” номинациясендә җиңүче Аделина Хәмидуллина белән.
Камышлы районының Яңа Ярмәк авылы клубында 8 Март бәйрәме уңаеннан “Озын толым” бәйгесе уздырылды. Бу тамашачы тарафыннан бик җылы каршыланды.
Татар кызлары элек-электән чибәрлекләре, тыйнак, уңган булулары белән дан тотканнар бит, ә аларның матурлыгы чәч толымнарының озынлыгына да бәйле булган. Андый кызлар Яңа Ярмәктә дә күп икән.
Клуб мөдире Рузалия Гафурова әниләрне, апаларны, кызларны Халыкара хатын-кызлар бәйрәме белән тәбрикләп, чараны башлап җибәрде. Китапханәче Алисә Хаматшина да бәйрәмгә килгән хатын-кызларга җылы сүзләрен җиткерде. Аннан соң берсеннән-берсе чибәр, зифа буйлы кызлар сәхнәгә күтәрелеп, үзләре белән таныштырдылар, исемнәренең мәгънәсе турында сөйләделәр, аш-суга, җыр-биюгә, тапкырлыкка, киенү, прическалар ясауга осталыкларын күрсәттеләр. Аеруча Ләйсән Фәйзуллинаның озын толымнары үтә дә матур булып күренде.
Бәйге концерт программасы белән үрелеп барды. Авылыбызның шагыйрәсе Гөлсинур апа Гафурова үзе язган “Озын толым” дип аталган шигырен укыды, ә Юлия Шакирова залда утыручы әниләргә, апаларга җыр бүләк итте.
Мәртәбәле жюри “Озын толым“да катнашучыларның һәр чыгышын бәяләп, нәтиҗә чыгарды. Ләйсән Фәйзуллина — “Назлы”, Әлфинә Мөгыйнова “Сөйкемле” номинациясе буенча бүләкләнделәр. Кызларның “Иң нәзакәтле”се Алисә Гусаинова булса, Аделина Хәмидуллинаны жюри әгъзалары “Гламур кыз” дип атадылар. Ә Яңа Ярмәкнең “иң озын толым”лы кызы Гүзәл Эссенова булды. Бу кызларга дипломнар һәм бүләкләр тапшырылды.
Рузалия ГАФУРОВА,
Яңа Ярмәк авыл клубы мөдире.
Просмотров: 1319