Камышлы районының Иске Ярмәк авылы мәдәният йорты тулысынча төзекләндерү эшләренә ябылу сәбәпле анда бер елга якын мәдәни чаралар үткәрелми торган иде. Ниһаять, ремонт тәмамланып, февраль ахырында мәдәният йорты тантаналы рәвештә кабат ишекләрен ачты.
Шушы тантанага багышланган тамашада данлыклы “Ак каен” фольклор халык ансамбле үзенең яңа программасын күрсәтте. Өлкән буынга алмашка килүче нәни артистлар Рәсүл Кәлимуллин һәм София Шәрәфетдинованы халык аеруча көчле алкышларга күмде.
Хәер, бу көнне балалар сәхнәдән төшмәде дә диярлек, аларның һәркайсы сәләтле, мактауга лаек иде. Әлмирә Сәлахова (рәсемдә) “Күгәрчен гөрлидер” җырын чын артистларча башкарды, эчтәлекле итеп шигырь дә сөйләде. Ә Азалия Галимуллина белән Аделина Гыйбадуллина “Дусларыма” җырын җырлап, барысын да таң калдырды.
Мәдәният йорты каршындагы бию түгәрәгендә шөгыльләнүче Алинә Нуриева, Ралинә Габидуллина, Регина һәм Азалина Гыйниятуллиналар төрле халык биюләрен башкардылар. Яшь җырчыларыбыз Наилә Ганиеваның, Илшат Кәримовның, урта буын вәкилләре Наилә Мөхәммәдиеваның һәм Зәмзәмия Вафинаның, сәхнә ветераннарыбыз Оркыя һәм Наил Галимуллиннарның, Айсылу Камалетдинованың, Әюп Минһаҗевның, Люция апа Ибраһимованың чыгышлары да кайнар алкышларга күмелде.
Концертны зур зәвык белән районыбызның танылган нәфис сүз остасы Әлфия Баһаутдинова алып барды. Әлфия апаларының нәфис сүз түгәрәгенә йөрүче балалар, өлкә күләмендә үткәрелгән шигъри бәйрәмнәрдә җиңү һәм призлы урыннар яулаган Лилия Шәйхетдинова, Рәйсә Гыймадиева, Альмира һәм Эльвира Сәлаховаларның шигырь сөйләвен халык тын да алмый тыңлап утырды. Гармунчылар Әсгать Сәгыйров һәм Борис Камалетдиновка да тамашачы бик рәхмәтле. Алар җырчыларның һәр чыгышын бизәп тордылар.
Яңартылган мәдәният йортында, матур итеп бизәлгән сәхнәдә чыгыш ясавы үзе бәйрәм бит ул. Мондый кичәләрне ешрак үткәрербез, дип өметләнәбез.
Наил ГАЛИМУЛЛИН,
Иске Ярмәк авыл Мәдәният йорты җитәкчесе.
Камышлы районы.
Просмотров: 1232