Камышлы районының Яңа Ярмәк авылында язны күңелле каршы алдылар.
Борын-борын заманда кешеләр нилектән җирдә яз булганын белмәгәннәр, ди. Алар ямьле язны җылы яктан кара каргалар алып килә икән, дип уйлаганнар. Шуның өчен карлар эреп сулар ага башлагач, каргалар килү хөрмәтенә бәйрәм ясый торган булганнар. Аны «Карга боткасы» дип атаганнар. Аланда уйнаганнар, җырлаганнар, күңел ачканнар, ахырдан ботка ашаганнар.
11 мартта Яңа Ярмәк авылы үзәгендә дә, мәчет янындагы мәйданда, «Карга туе» бәйрәме узды. Иртән-иртүк биредә татар көйләре ишетелә башлады. Тирә-юньгә тәмле исләр таратып, шашлык кыза, зур казаннарда берничә төрле ботка пешә, самоварлар пар бөркеп кайнап утырә, ә киң өстәл өсте авыл халкы тарафыннан әзерләнгән милли аш-сулардан сыгылып тора. Әнә табада чаж-чыж килеп коймаклар да кызара башлады. Сабан туе диярсең, күрше авыллардан сәүдәгәрләр килеп, сату палаткаларын тезеп куйдылар. Апалар, әбиләр иң матур күлмәкләрен киеп, аллы-гөлле шәлләрен беркәнеп чыкканнар. Яз бит, бу вакытта аеруча гүзәл буласы килә.
Авыл җирлеге башлыгы Рәсих Әхмәтзыя улы Габидуллин биредә яшәүчеләрне “Карга туе” бәйрәме һәм 8нче Март — Халыкара хатын-кызлар көне белән котлап, үзенең теләкләрен белдерде, шушы бәйрәмне оештыруда катнашкан спонсорларның барысына да зур рәхмәтләрен җиткерде.
Аңардан соң кунакларны Мәдәният йортының җитәкчесе Рузалия ханым Гафурова сәламләде. Авыл үзешчәннәре һәм мәктәп укучылары — барысы да күңелне күтәрердәй бик матур җырлар, биюләр башкардылар, төрле сәхнә күренешләрендә катнаштылар.
Ниһаять, ботка пешеп җитте… “Тәмле микән боткасы, авыз итәек әле. Матур язны каршылап, бәйрәм итәек әле”, — дип, бәйрәмне алып баручылар авыл халкын казан янына чакырып алдылар.
Менә мәчеттән чыккан бабайлар өстәл артына узды, аннан әбиләр, апалар утырышты. Бу вакытта авыл китапханәчесе Алисә Хаматшина балалардан төрле уеннар уйнатты. Соңрак алар да бәйрәм табыны тирәли җыелдылар.
Урам кичкә кадәр гөрләп торды. Тирә-юньдә яңгыраган көй-моңнарны тыңлый-тыңлый, “Карга туе” бәйрәменә килүчеләрнең яше, карты рәхәтләнеп үзара аралашты, тәмле ризыклар белән сыйланды.
Просмотров: 1471