23 майда Башкортостан республикасы, Октябрьск шәһәре, Нарыш бистәсендә 1963 елдан башлап 1975 елга кадәр имам вазифасын башкарган Исмәгыйль хәзрәт Сәлимшин истәлегенә конференция үтте. Самара өлкәсеннән бу чарада Камышлы районы Иске Ярмәк авылы мәчетенең имам-хатыйбы Габдулла хәзрәт Мөхәммәд-Кәримгә катнашырга насыйп булды.
Бу чарага Казан шәһәрендән мәртәбәле кунаклар: Апанай мәсҗидендән — Әхмәд хәзрәт Сабиров, Нияз хәзрәт Сабиров, «Безнең Мирас» журналыннан — баш мөхәррире урынбасары Ленар Гобәйдуллин, Бөтендөнья татар конгрессы «Аксакаллар шурасы» рәисе Рәүф Хәсәнов, рәссам-дизайнер Ратмир Ахияров, Исмәгыйль хәзрәт Сәлимшинның кызы Сиринә апа Шәһимәрданова, аның улы — Русия мөселман эшмәкәрләре президенты Айдар Шәһимәрданов, оныгы Әмир Шәһимәрданов, мөхтәсиб, Октябрьск шәһәре мәдрәсәсе мөдире Мәүлемҗан хәзрәт Сибгатуллин катнаштыралар.
Чара барышында әлеге бистә имамы Ильнур хәзрәт Нуруллин да матур итеп чыгыш ясады.
Үзебезнең өлкәбездә нәшер ителгән «Самара татарлары» журналларын, календарен анда катнашкан барлык кунакларга бүләк итеп тапшырдым. Моның өчен Гомәр улы Ильяс әфәндегә чын күңелдән рәхмәт сүзләре әйтәсебез килә.
Динебезне, иң кыен дәһрилек вакытларда халкыбызга җиткергән шәхесләребез онытылмасын иде, мондый чаралар үткәрелсен иде, дигән теләктә калам.
Габдулла хәзрәт МӨХӘММӘД-КӘРИМ,
Камышлы районы Иске Ярмәк авылы мәчетенең имам-хатыйбы.
Просмотров: 354
Добавить комментарий