Зәкия БӘШӘРОВА.
1933 елның 13 декабрендә Нәгыйм ага белән Зәрига апа гаиләсендә беренче балалары — кызлары туа. Анарга Зәкия дип исем бирәләр. Соңрак гаиләдә тагын өч кыз бала дөньяга килә.
Кечкенә Зәкия 3-4 сыйныфта укыганда ук инде үз Йолдыз авылының сәхнәсендә җырлый башлый. 5 сыйныфны ул Камышлы авылы мәктәбенә чабатадан йөреп тәмамлый. 6 сыйныфка укырга бармый. Әнисенең кул арасына кереп, фермага эшкә китә.
1955 елның жәендә җиткән кыз авылдашына — оста тальян гармунчысы Жәгьфәр абый Бәшәровка — тормышка чыга. Яшьләр никах укытып, гөрләтеп туй уздыралар. Якты, матур дөньяга биш бала - Фаил, Резедә, Рәмзия, Сиринә һәм Фидаил — аваз салалар.
Бүгенге көндә уллары Фаил гаиләсе белән Камышлыда яши, кызлары Резедә — Зирекле авылында, Рәмзия гаиләсе белән — Казахстанда, полиция хезмәткәре, майор Сиринә — Камышлыда, полиция хезмәткәре, прапорщик (хәзер инде лаеклы ялда, автобус йөртүче булып эшли) Фидаил гаиләсе белән — Яр Чаллыда.
Зәкия апа — Камышлы театрының һәвәскәр артисты, авылыбызның моңлы җырчысы. Үз балаларын да җырга-моңга гашыйк итеп үстергән ул.
Зәкия апа, авыл хатыны буларак, гомере буена барлык авыр эшләрне дә башкарган, ирләрне уздырып, урманнарны яңгыратып печән дә чапкан, сәнәк-көрәкләрне дә үзе саплаган хәтта.
Күп еллар уңган ханым тормыш иптәше белән бергәләп йомшак итеп киез итекләр бастырып, аларны сатып, көн күрделәр. Минем әти-әни дә һәрвакыт Бәшәровлардан итекләр бастырттылар. Балачакта әниемнең миңа кечкенә генә йомшак баскан киез итек кидергәне бүгенгедәй хәтеремдә. Гаиләбездә сигез кеше иде: биш бала, әти-әни һәм әби. Барыбыз да алар баскан итекләрдән йөрдек, ул вакытта кибетләрдә кышкы аяк киемнәре әллә-ни юк иде бит.
Үлгән артыннан үлеп булмый, яшәргә, тормышны дәвам итәргә кирәк. Зәкия апа шатлыгы, кайгысы, чире булса да, эшләп-арып талса да, кемгә дә белгертми. Челтерәп аккан чишмә суларын хәтерләткән тавышы белән моңлы җырларын башкарып, йөрәген тынычландыра. «Җырларым — минем даруым», — ди ул.
Безнең гаиләбез дә 80-нче еллар ахырында Иске Ярмәк авылыннан Камышлыга күченде. Шөкер, шул вакыттан алып бүгенге көнгә кадәр Зәкия апаны сәхнәдә күрәм мин.
Кышкы кичләрдә җырлый-җырлый җеп эрли һәм балаларына, оныкларына җылы оекбашлар бәйли Зәкия апа. Ике тапкыр Казанга барып, «Кардәшлеккә чикләр юк» һәм «Җырлыйк әле» дип аталган бәйге-тапшыруларда да катнашып кайткан ул. Самар шәһәрендә үтүче милли чараларны да калдырмаска, аларда актив катнашырга тырыша. Бик күп мактау кәгазьләре, дипломнар белән бүләкләнгән. Талант иясе шигырьләр дә иҗат итә (Гомер йомгагы, Минем шатлыгым, Сүнмәс Йолдызым). Моңлы сандугачыбыз мөселман кануннары нигезендә яши, намазларын калдырмаска тырыша.
Безгә шундый матур үрнәк булып, тагын озак еллар иминлектә, байлыкта, сау-сәламәт булып яшәргә язсын сиңа, Зәкия апа.
Җәмилә МИНЕГАЛИМОВА.
Камышлы авылы.
Просмотров: 1678